Fotografías Xincana de Participación Infantil Vilagarcía

O pasado sábado 28 de xuño participamos na xincana organizada polo Concello de Vilagarcía no parque Miguel Hernández (Vilagarcía de Arousa)

Parque Miguel Hernández (Vilagarcía de Arousa)

Ás 11:00h da mañá María, Adriana e Óscar xa tiñan todo preparado para comezar coa actividade.

A idea era crear un espazo de participación para os nenos na vida comunitaria. Por iso contábamos con caixa de correos para enviar cartas de suxestións directamente ao concello, un mural onde poñer os nosos lugares favoritos na cidade e outro para escribir as actividades que máis nos gustaría ter na oferta do concello.

Ás 11:20h comezaron a achegarse os primeiros participantes que traballaron con moito entusiasmo debuxando e imaxinando os seus lugares favoritos para xogar e desfrutar.

Despois fixemos as nosas propostas de actividades ao concello onde foron as actividades relacionadas co baile e a canción as que tiveron mellor acollida. Tamén propuxemos un parque de instrumentos, columpios, tobogáns... e zonas para xogar aos deportes de pelota.

Tamén houbo un espazo para os maiores que participaron enviando as súas suxestións directamente ao concello na caixa de correo.

Despois de ter todos moitas ideas: tobogáns, escenarios, ríos, lagos, campos de fútbol... Creamos entre todos unha maqueta con materiais reutilizados onde intentamos plasmar as nosas propostas dunha maneira organizada.

Finalmente conseguimos un espazo que compuña todas as nosas preferencias: zona verde, parque de area, tobogán, columpio, lagoa con animais (incluso un crocodilo!!), campo de fútbol, escenario para actuacións, piscina...

Agora sabemos que as nosas opinións tamén contan e estamos dispostos a compartilas cos maiores tamén. Se estades lendo estas liñas e tedes algunha idea nova podedes comentala nos comentarios deste mesmo blog.

Ata a próxima!!!